विराटनगर । रोटरी क्लब अफ विराटनगर डाउनटाउनले विराटनगर बेलगाछीस्थित शिव आधारभूत विद्यालयको मुहार फेरिएको छ । रोटरी लिट्रेसि मिसन को टिच मोडल अन्तर्गत विराटनगर १ स्थित सो विद्यालयको ग्लोबल ग्रान्ट नंः २४५३३५९ “द भिजनरी प्रोजेक्ट” मार्फत रोटरी क्लब अफ विराटनगर डाउनटाउनले ह्याप्पी स्कूलमा रूपान्तरण गरिएको थियो।
यस परियोजनाका लागि क्लबको अन्तर्राष्ट्रिय साझेदार रोटरी क्लब अफ डोना पाउला ३१७० रहेको छ ।सो विद्यालयमा गरिएको सम्पूर्ण निर्माण कार्य सम्पन्न गरि बिहीबार हस्तान्तरण गरिएको छ । विराटनगर महानगरपालिका की उपमेयर शिल्पा निराला कार्कीको प्रमुख आतिथ्यतामा सम्पन्न कार्यक्रममा विराटनगर महानगरपालिका शिक्षा महाशाखाका कृष्ण भट्टराई, रोटरी सहायक गभर्नर डा. बिजु थपलिया र अन्य विशिष्ट व्यत्तित्वहरूको उपस्थिति रहेको थियो ।
यस ग्लोबल ग्रान्ट परियोजना २०२३–२४ मा इमिडेट पास्ट प्रेसिडेन्ट कुसुम अग्रवालको कार्यकालमा सुरु गरिएको थियो । सोही परियोजना २०२५ मासम्पन्न भएको रोटरी क्लब आफ विराटनगर डाउनटाउनकी अध्यक्ष मञ्जु अग्रवालले जानकारी दिइन् । साथै, सो कार्यक्रम सम्पन्न गर्न क्लबका पूर्व अध्यक्षहरू रचना राठी र अर्चना तापडियाको पनि महत्वपूर्ण योगदान रहेको थियो ।
परियोजना अन्तर्गत सो विद्यालयमा ८ वटा नयाँ तथा पुरानो शौचालय निर्माण गरिएको छ । जसमध्ये ४ वटा शौचालय उपमेयर कार्की र वडा समितिको पहलमा विराटनगर महानगरपालिको सहयोगमा निर्माण गरिएको थियो ।
त्यसैगरी, स्वच्छ खानेपानीको लागि वाटर स्टेशन निर्माण, विद्यालयको कम्पाउण्ड वाल मर्म, बाहिरी पर्खाल तथा खेल क्षेत्रको रंगरोगन, मोन्टेसरी क्षेत्र, कार्यालय क्षेत्र, र भोजन क्षेत्रको विभिन्न संरचना निर्माण, बत्ती, पंखा तथा अन्य विद्युतीय कार्य, दुई कम्प्युटर सेटको स्थापना र अन्य आवश्यक मर्मत कार्य तथा नयाँ फर्निचरको व्यवस्थापन पनि गरिएको छ ।
विद्यार्थी, शिक्षक तथा समुदायलाई लक्षित गरी जागरूकता कार्यक्रम तथा सरसफाइ सामग्री वितरणसमेत गरिएको क्लबले जनाएको छ । यस परियोजनाबाट शिव आधारभूत विद्यालयका १५० विद्यार्थी, शिक्षक, अभिभावक तथा समुदाय लाभान्वित भएका छन् ।कार्यक्रममा क्लबका पदाधिकारी र सदस्यहरुको पनि बाक्लो उपस्थिती रहेको थियो ।
प्रकाशित मिति: २०२५-०३-२८ , समय : २०:००:५४ , ६ दिन अगाडि
