विराटनगर । मोरङ क्षेत्र नम्बर २ का संघीय सांसद ऋषिकेश पोखरेलले सुनवर्षी महाराजथान अस्थाको धरोहर भएकाले यसको चौतर्फी विकासमा लागि पर्ने बताएका छन् । रतुवामाई–५ स्थित सुनवर्षी महाराजथान पोखरी परिसरमा सोमबारदेखि सुरु भएको श्रीमद् भागवत सप्ताह ज्ञान माहायज्ञको उद्घाटन कार्यक्रममा बोल्दै सांसद पोखरेलले यस्तो बताएका हुन् ।
उनले कोशी नदी पूर्वका विभिन्न २१ जातीहरुको आस्था र धरोहरको केन्द्र सुनवर्षी महाराजथान भएकाले आफ्नै पहलमा सो स्थानमा जातीय संग्रालय निर्माण कार्य सुरु गरिएको बताए ।
सांसद पोखरेलले सुनवर्षी थान सांस्कृतीक, धार्मिक तथा पर्यटकीय केन्द्र रहेकाले सोही बमोजिम आफ्नै अग्रसरतामा पर्यटकीय क्षेत्रमा रुपमा पर्यटन बोर्डमा दर्ता भएको बताए । ‘यहाँ २१ भन्दा बढी जातजातीको बसोबास छ । जसको आगनमा थान हुन्छ, विभिन्न गाउँको थान–थान मिलेर ग्रामथान र ग्रामथान–ग्रामथान मिलेर यो सुनवर्षी महाराजथान बनेको हो । यहाँको धार्मिक ऐतिहाँसिकता निकै पुरानो छ ।’ उनले भने,‘यसको विद्वानहरुबाट सम्पूर्ण अध्ययन गराएर पर्यटन बोर्डमा दर्ता गराएका छौँ ।’
प्रतिनिधिसभा सार्बजनिक लेखा समितिका सभापति समेत रहेको पोखरेलले आफु संविधानसभा सदस्य रहँदा सो स्थानमा विभिन्न जातीको जातीय संग्रालय स्थापना गर्ने कामको सुरुवात गरिएपनि बिचमा सो काम त्यसै अड्कीएकाले अब पुनः त्यसका लागि पहल पर्ने बताए । उनले स्थानीयतहलाई सो स्थान कस्तो बनाउने भनेर डिपिआर तयार गर्न आग्रह गर्दै सुनवर्षी महाराजथानलाई राष्ट्रियस्तरमै स्थापित गराउने काममा आफु लागि पर्ने बताए ।
कार्यक्रममा रंगेली नगरपालिकाका मेयर दिलिप बगडीयले सुनवर्षी महाराजथानलाई रंगेलीको संसारीमाइस्थान जस्तै धार्मिक पर्यटकीय क्षेत्रका रुपमा विकास गरि रोजगारी अवस्थासमेत सृजना गर्न सकिने बताए । उनले त्यसका लागि सुनवर्षी र रतुवामाई नगरपालिका लागि पर्नुपर्ने बताए ।
सो अवसरमा सुनवर्षी नगरपालिकाका मेयर श्याम राजवंशीले सुनवर्षी महाराजथान भौगोलिक हिसाबले रतुवामाई नगरपालिकामा परेपनि यसको विकास र प्रवद्र्धनमा आफु लागि पर्ने बताए ।
कार्यक्रममा रतुवामाई नगरपालिकाका मेयर नागेश्वर प्रसाद सिंह गन्गाईले रतुवामाई नगरपालिका अगाडीको दायीत्वबाट मुक्त हुने क्रममा रहेको बताउँदै अब सुनवर्षी महाराजथानमा लगानी गर्ने प्रतिवद्धता जनाए ।
सो अवसरमा सुनवर्षी नगरपालिका–३ का वडाध्यक्ष एवम् सुनवर्षी महाराजथान संरक्षण समितिका अध्यक्ष अतनकुमार बुढाथोकीले विगतमा लथालिङ्ग अवस्थामा रहेपनि सांसद पोखरेलकै पहलकदमीमा सो स्थानमा केही संरचना र घेराबार गरि संरक्षण गरिएको बताए । उनले सुनवर्षी र रतुवामाई दुवै नगरपालिकाको विशेष ध्यान सुनवर्षी महाराजथानमा पुग्नुपर्ने बताए ।
कार्यक्रममा श्रीमद् भागवत सप्ताह ज्ञान माहायज्ञ आयोजक बाला चतुदर्शी व्यवस्थापन समितिका अध्यक्ष तेज बहादुर बरालले सात दिनसम्म चल्ने पुराण शिवालय मन्दिर निर्माणका लागि आयोजना गरिएको जानकारी दिए ।
उद्घाटन कार्यक्रममा रंगेली नगरपालिकाकी उपमेयर भूमा पराजुली, सुनवर्षी नगरपालिकार्की उपमेयर मिरादेवी दास, रतुवामाई र सुनवर्षी नगरपालिकाका विभिन्न वडाका वडाध्यक्ष तथा वडा सदस्यहरुको उपस्थिती रहेको थियो ।
उद्घाटन अघि कलशयात्रा निकालिएको थियो । आजबाट सुरु भएको श्रीमद् भागवत सप्ताह ज्ञान माहायज्ञ सात दिनसम्म चल्नेछ ।
प्रकाशित मिति: २०२३-१२-०४ , समय : २२:५७:३७ , १ वर्ष अगाडि
